هوة احنا متبثطرين يا ثوعاد ؟

" معلثى ... همه الناث كلهم كده .... كوثة , ووثطة , ومحثوبية ... اللى معاه وثطة هو اللى يكثب فى البلد دى , انا واعوذ بالله من كلمة أنا , احثن موزيع ناطك بالعربية العامية فيكى يا مثر يام الدنيا , والمفروض كنت اثيع نثرات الاخبار , بث تقول ايه بقى فضلوا عليا ابن الجناينى , ويثبونى انا , انا ابن رئيث الـ .... , خريج الكونثرفتوار شعبة بيانولا , انا يثوبونى انا , وآل إيه يثوبونى ويفرطوا فيا بالثهولة دى عثان التغ , مع ثوية تلعثمات خفيفة , اثاى ده يحثل إثاى بث ؟ " .

طبعا ده مش كلامى , واستحالة يكون كلامى , ومؤقتا اعتبروه كلام واحد اعرفه . بس عارفين انا كاتباه ليه ؟ كاتباه عشان مش حلاقى مدخل احسن من كده عشان اتكلم فى موضوع الوسطة . بس المرادى انا مش حتناوله من وجهة النظر التقليدة اللى زهقنا منها وهيه بتقول ان الوسطة ظاهرة غير اخلاقية ووحشة وكخة ووو...... , الكلام ده احنا كلنا عارفينه لان الطبيعى ان المنافسة الغير المشروعة بتسيب اثر سلبى فى نفوس المجتهدين , ومن غير ما اخش فى تفاصيل اكيد كلكم عارفينها , احب اطمنكم ان مش ده اللى عايزة اتكلم عنه المرادى , لا انا حتكلم عن الوسطة النهاردة من منظور اللى عنده وسطة لشغلانه ومع ذلك اترفض , ومن وجهة نظر اللى معندوش وسطة ومع ذلك نجح فى شغله , و برده من وجهة نظر اللى عندة وسطة و ما استخدمهاش ومع ذلك نجح فى شغله .... , واحب اوجه كلمه فى النهاية لكل واحد فيهم يمكن مشكلة الوسطة فى الحالة دى نقدر نحلها من جذورها , قشطة كده ؟ خلاص قشطة .

اولا : الوسطة من منظور اللى عنده وسطة لشغلانه ومع ذلك اترفض :

تخيل منظر حضرتك وانت داخل تقدم على وظيفة موبايلك فى جيبك , ملمع جزمة حضرتك , كرت الوسطة فى محفظة سعدتك , والسى فى بتاعك تحت باطك , ودخلت مستنى الانترفيو بتاعك وبصيت حواليك ولقيت ناس كتيرة ملة بردة مقدمة على الوظيفه اياها , ممكن منهم حد معاه كرت وسطة , وممكن منهم معهمشى الورقة الرابحة دى , بس انا حفترض انك فى وسط ناس ما عندهاش وسطة , وان الفوز بالوظيفة من حقك من الناحية الواقعية , لان كل اللى حواليك واقعين , وبعد يوم ولا اثنين فوجئت بانك اترفضت واتآخد بدالك واحد تانى جربوع وشحات ولابس مهلل بس كفاءة ومتعلم ويقدر يدى فى الشغلانه دى أكتر منك , ساعتها حتحس بإية ؟اوعى تقولى حتحس بالظلم عشان ما اتقبلتش وانت يادوب كل اللى عملته انك لمعت جزمتك وجبتلك كرت وسطة , لان اللى بيكدب بيروح النار , عموما لو ما كنشى حصلك حاجه زى دى قبل كده فأحب اقولك حاجه , بجد بجد , ياريت تحط الجزمة اللى انت لعمتها دى فى بقك وتتلم وتعد ساكت وتجتهد شوية لانك انسان تابع مش مستقل . يلا بالسلامة نخش على اللى بعده .

ثانيا : الوسطة من وجهة نظر اللى ما عندوش وسطة ومع ذلك نجح فى شغله :

مش عارفة بصراحة اقول لواحد زى ده ايه غير ان لكل مجتهد نصيب , وانه اكيد تعب عشان كده وصل , وابصراحة انا بحب الشخصيات اللى من النوع ده , بس للاسف مش كلها , ليه مش كلها ؟ لان ببساطة شخصية زى دى تتحول فى النهاية لما تعلى وتعلى اكتر واكتر لشخصية بتدى كروت وسايط للناس اللى ما تستحقشى , وبكده يستغلوا مركز الناس اللى تعبت فى عشان توصل هيه بسهوله , وطبعا مافيش احسن من دكاترة الجامعة فى الموضوع ده , تلاقى الدكتور من دول وصل للوصله ده بالعافية لحد اما حفى , وفى الاخر يوصى على دى وعلى ده , وبكده برده بيستخدم الوسطة اللى ما كانشى بيحبها زمان , وده طبعا بطريقة غير مباشرة . واحب اقول للصنف ده , اتقى الله وسيبك من الكلام الفارغ ده ومش عشان تتمنظر وتتفشخر باللى انت وصلتله تقوم تعمل كده وتدوس على ناس تانية كانت تستحق توصل بمجهودها + بالنسبة للناس اللى ما عملتشى كده ولا استغلت نفوذها بعد ما وصلت احب اقولها بجد انتم ناس محترمة .

ثالثا : الوسطة من وجهة نظر الناس اللى عندها وسطة ومع ذلك ما استخدمتهاش :

فدى احب اسمع رأيكم انتم فيهم فى تعليقاتكم . وعموما أحب اقولهم : خلى بالكم لانكم ممكن الناس تنسب نجاجكم ده فى يوم من الايام للوسطة اللى انتم فى الحقيقة مااستخدمتوهاش .

ويبقى السؤال هوة متبثطرين ياثوعاد ؟ يعنى بتوع واسطة ولا لاة ؟ وبجد احب اسمع اجاباتكم بصراحة شديدة ,. حتى لو كنت لجأت للوسطة فى مرة من المرات فبرده احب اعرف كان فى انهى موقف بالضبط ؟ اوك ؟ يلا باى