الاثنين، 29 سبتمبر 2008

فودافون ...عيش أحلى مافى اللحظة

ياخوانا فيه واحد زى الفل باعت المشكلة دى :

" انا مشكلتي لذيذه خالص , عارفه لما الواحد يكون عادي جدا وبعدين يبقي فرحان جدا جدا , بيبقي خايف ان السعاده اللي هوا فيها دي تروح مشكلتي اني سعيد بس خايف علي سبب سعادتي انه يضيع مني او يبعد عني يريت حل يخفف عني القلق اللي انا فيه "
ودى كانت بتاريخ 29 سبتمبر


الله يخربيت اللى يزعلك ..... شوف : لما تحس انك فرحان او انك سعيد ... افرح اوى اوى اوى ... وما تفكرشى فى اى حاجه ممكن تزعلك او تقلقك.... ولما تحس انك زعلان ومتدايق ..... ابقى عيط اوى اوى اوى وما تكتمشى فى نفسك

عيش الفرح والحزن زى ما همه .... واستمتع بكل لحظة فيهم ... بحلوها وبمرها .... ولو حصل واتصادف ان الحاجه اللى مفرحاك واللى اتسببت فى سعادتك دى راحت منك او بعدت عنك .... حاول انك ترجع السبب ده تانى بكل الطرق عشان تحافظ على سعادتك .... وان ما عرفتش ترجعه تانى .... انساه واكسر وراه قله ..... واصنع سبب غيره يسعدك .... وطبعا عشان تتحول من السبب الاولانى فى سعادتك للسبب التانى اللى انت صنعته بنفسك عشان يسعدك بدل الاولانى ... اكيد حتمر بمرحلة صعبه او منحدر خطير .... وممكن تكون فى الفترة دى حزين .... ولما تحزن وقتها فكر نفسك بإن فيه بصيص ضوء للسعاده حيجيلك قريب
ملاحظات على رسالة الاخ غير المعرف الكريم :

1 - واضح ان سبب سعادتك عاطفى
2 - انت شخصية رومانسية جدا لاقصى درجه

3 - يابخت اللى يلاقى حد متمسك بيه زيك كده

4 - صعب حد يلاقى واحد زيك ويبعد عنه

5 - اغلب الظن ان سبب قلقك من ضياع سبب سعادتك ده مرتبط بماضى ... او موقف حصل قبل كده ... مثلا كنت فرحان وسعيد وفجأة راح منك سبب السعاده ده لفترة ... عشان كده انت خايف ليتكرر الموقف ده مرة تانيه

6 - فودافون بتقولك عيش احلى ما فى اللحظة .... واوعى تخاف.

الخميس، 25 سبتمبر 2008

عندك مشكلة ؟ .... اومو يحلها ( انت تسأل وناعسة تجيب )


يارب ياساتر

والله الواحد كان بدأ يفقد الامل ان حد يعبرة ويبعتله اى مشكله... بس الحمد لله ... فرجت , وزى مانتم عارفين ... مصائب قوم عند قوم فوائد ( ياريت ما حدش يزعل من الجملة دى بس هيه دى الحياة ) نبتدى بأول مشكلة ( والوحيدة حتى الان ) :


الاخ الغير معرف باعت يقول :
----------------------

" أنا بقي عارف مشكلتي اللي حصلتلي النهاردة راجل غريب جدا وغريب أحسن منه يشتمني ويهزقني أنا مقولتش أني أحسن واحد في الكون وعارف أني أزبل من الزبالة بس ميجيش واحد زي ده علي آخر الزمن ويشتمني أنا ليه يعني هو أنا كنت أيه بالظبط في نظره!!!!أرجو الإفادة وليس المواساة".

ودى كانت بتاريخ 21 سبتمبر

واضح طبعا من الرسالة ان الاخ الغير معرف ده اتشتم واتهزأ ( هوة اللى قال كده والله ) وهوة متدايق .... طبيعى جدا انك تدايق ... ده عادى ... والعادى برده انك يكون ليك رد فعل من التالى ( وانت وشخصيتك بقى ) :

الاول : انك تلومه ( انطلاقا من مبدأ ابو سلمى الحنين ) ومش بعيد و تتهور وتقوله يا وحش ( وانا بنصح بالحل ده فى حاله لو كان بينك وبين اللى هزأك عشم او صداقه او علاقه طيبه .

التانى : تهزأة وتشمه بنفس اللى شتمك بيه : وان كنت ضد الاجراء ده فى مجال الشتايم , لأن اللى بيشتم بيفقد فى الماقام الاول احترامه لنفسه لانه حينزل بمستواه لمستوى اللى هزأه , ووالله عمر ما كان الاحسن هوة اللى بيشتم وبيعلى صوته اكتر من الطرف التانى , لا ... دائما الاحسن هوة اللى بيتغلب على عصبيته وبيكظم غيظه ..... وعاده بينصح بالإجراء ده فى حاله لو كان عيل صغير عند ركبتك عمل فيك عمله سوده وساعتها ممكن تهزأة لكن عشان خاطر بابى ومامى بلاش تشتمه احسن الواد يتعقد ولا حاجه ويجيله تبول لا ارادى بالليل من الخضه.

الثالث : تقوله الله يسامحك : انا شخصيا بحترم كلمة الله يسمحك اوى وبرضه كلمه حسبى الله ونعم الوكيل وخصوصا لما تتقال فى وش اللى زعلك ...... بس خلينا واقعيين ... فى كل الاحوال ممكن نخلى الدعوة دى على لسانا لكن ما فيش مانع برده لما نقول كده للى زعلنا وظلمنا وفى نفس الوقت نسعى عشان ناخد حقوقنا من اللى سلبوها مننا ونتوكل على الله ونرد اعتبارنا .

الرابع : تنتقم : انا ما بحبش الانتقام ... وما انصحشى بيه اطلاقا .... بس بقوله بس عشان لو جه فى بال الغير معرف ده انه ينتقم فياريت يعرف انك بعد ما تقوم بالعملية الانتقامية بنجاح فغالبا حتحتقر نفسك اوى اوى اوى اوى اوى .... وحتحس انك اتنجست وبقيت انسان ومش بعيد تكره نفسك زى ما شعبولا بيكره اسائيل بالضبط .

الخامس : تسكت وتحط لسانك فى بقك : وده اضعف الايمان .... اه الموضوع ده بيحصل لما تكون ما لاكشى حيلة يا ولداه .... لكن للاسف الإجراء ده له عواقب وخيمة ... لان الطرف التانى الظالم غالبا حيسوء فيها الهبل على العبط ومش بعيد يستضعفك ويكرر اللى عمله تانى وتالت .... عشان كده الحل ده فى حالة انعدام الحلول الاخرى

السادس : تآخد حقك بنفسك : يعنى لو كنت تقدر .. بس ابقى خلى بالك احسن تاخد ازيد من حقك ... احنا عايزين حقك وبس

السابع : تدعى عليه فى رمضان ( دعوة المظلوم مستجابة ) : الحل ده ياجماعه ميت فل وعشرة ... وهوة من الحلول الممتازة .... مع السعى طبعا لرد اعتبارك

الثامن : تخطط وتكتك وتآخد حقك بالحيلة : وبرده الحل ده جاى فى الجون .... ده طبعا لاصحاب العقول الحكيمة فقط ... والاغبياء يمتنعون

التاسع : تستبيع و وتضربه وتطيح فيه : حل زفت طبعا

العاشر : تأجر عليه بلطجيه : وده بقى زفت الزفت

مجموعه ملاحظات على رسالة غير المعرف الكريم :
-------------------------------------
1 - هوة بيقول " وعارف انى ازبل من الزباله " : اوعى تقول كده على نفسك لانك لو فى نظر نفسك زباله ... فما تتوقعشى انك تكون فى نظر غيرك فرخة بكشك .... لازم حتقل من نظرهم .... ثق فى نفسك الاول عشان تعرف تدافع عن حقك وعن كرامتك .
2 - هوة برده بيقول " بس ما يجيش واحد زى ده ... ويشتمنى " : ما تستقلش بحد ... لان ممكن يكون الحد ده بمنتهى البساطة احسن منك عند ربنا فى امور تانيه .
3 - وهوة برده بيقول " على اخر الزمن " : الاعمار بيد الله , بس انت ايه اللى خلاك تقول ان اخر الزمن هوة ده بالنسبالك ... مش يمكن تكون لسه فى بداية حياتك وانت مش واخد بالك .... صدقنى مش ان واحد زعلك تبقى دى نهايه الدنيا .

4 - واخيرا هوة قال " ارجو الافادة وليس المواساه " : ساعات المواساة بتبقى اهم من النصيحة ... أسال مجرب .
5 - مش صح انى احكم على مشكلتك من طرف واحد اللى هوة انت لان بمنتهى البساطة ممكن لو سمعت الطرف التانى اكتشف ان انت الغلطان فى حقه .... بس الحاجه الوحيدة اللى خلتنى اتعاطف معاك من غير مااسمع الطرف التانى - طبعا - انى عارفه كويس انت مين ومشكلتك ايه بالضبط .... والنصيحة النهائية انك تدعلى ربنا وتشكيلة همك مع السعى لاخد حقك بكل الطرق الاخلاقيه فقط ... وان ما جابتشى نتيجة ابقى خد الاجرائات الروتينيه البحته لو كان فيه .












السبت، 20 سبتمبر 2008

حملة حلال العقد للملعم ابو سلمى الحنين :


احبك حب البطه للبطوط والفرخه للكتكوت والصعيدى للنبوت والجربان للبرغوت

بشرى سارة - نوعا ما - يعلن قسم البوستات الخاصة بأبو سلمى الحنين فى مدونة ناعسه عن التالى : اللى عنده اى مشكلة اجتماعيه او نفسيه او عاطفيه او سياسية او ماديه ممكن يسيب نبذه مختصرة فى اللينك بتاع قسم التعليقات تحت , وان شاء الله حرد عليه اول بأول فى بوستات منفصلة وخاصة عن كل مشكله وربك يستر على الولايا ...... بس عايزين نتفق ياخوانا ان ما حدش يسأل فى اى فتوى دينيه زى ما حصل قبل كده لان زى ماانتم عارفين انى مش اهل للفتوى ومش حرد عليكم فى الحاله دى ولو حد غلس ححذف تعليقه والله ... وانتم حرين بقى ..... عايزين كده مشاكل خفافى خفافى ..... حاجه ع السريع كده ......وتحذير تام من السب والقذف عشان مش طالبه تهديدات على البيت الله يكرمكم .... الحكاية مش ناقصه فذلكه ..... وكما قال الشاعر سبت حد اتنين ثلاث .... وماسابهوش النقاد وقالوا : اربع خميس والجمعه كمان.


وتنه عامر
ودمتم




الخميس، 18 سبتمبر 2008

اللى عايز يكتب تعليق على الصورة يتفضل اهلا وسهلا فى اللينك بتاع قسم التعليقات تحت الصورة


هرتلة اخر الليل

بندحرج التماسى
عندى شوية اسئلة شاغلة بالى ومش لاقيالها تفسير , قولت اعكنن عليكم بيها عشان ما يبقاش حد احسن من حد :
اولا افتكر اننا متفقين انه منتهى إنعدام الضمير لما الواحد يقف موقف الحياد بين الظالم والمظلوم , لان البنى آدم الطبيعى المفروض يعمل حاجه من اتنين , يأما يقف مع المظلوم ضد الظالم , او يتلم ويحط لسانة فى بقه لو خايف من اى بطش طالما انه من جواه مع المظلوم بقلبه , فمابالكم لما انسان يقف مع الظالم ضد المظلوم ؟ الانسان اللى يعمل كده يبقى ايه مثلا ؟ ضميرة معدوم ؟ قلبه ميت وما بيرقش؟ مستبيع ؟طب ازاى اقدر اتعامل تانى مع الظالم وانا عارفه انه ظالم ؟ وهل الظالم يتآمنله تانى بعد ظلمه ؟ ولو انت زيى , لا ليكى لا فى الطور ولا فى الطحين واتحطيتى فى موقف لازم غصب عنك تحكمى كشاهد ما بين الظالم والمظلوم وقولتى للظالم انه ظلم فلان وفلان فى وشه الظالم ليه ساعتها بيزعل وبيتكسف من نفسه ؟ هل لانه طلع عنده دم فجأه وبقى حساس ؟ يعنى مدايق من رأى الناس فيه ؟ ولا مدايق وندمان من عملته السوده ؟ الشخص الظالم ده شخص مظلوم من نفسه فى الاساس؟ ولا الناس ظلمته اوى عشان كده اتحول لظالم ؟ هوة الظلم بيؤدى للإنتقام ؟ وهى الناس ليه لما بتشوف الانتقام ده ما بتبصش هوة فلان انتقم ليه يعنى سبب الانتقام اللى هوة الظلم اللى وقع على الانسان ؟ وساعتها ليه الناس بتحكم على الشخص المنتقم ده على انه ظالم ؟ وليه الناس ساعتها بتحكم على الشخص اللى بدأ فى الاول بالظلم ساعتها على انه مظلوم ياحرام ؟ هوة انا لو اتظلمت اوى وحسيت بمرارة فى يوم , ممكن اظلم غيرى كرد فعل او كأنتقام من المجتمع او الناس اللى ظلمونى ؟

بصراحة , انا عندى اكون مظلومه اهون مليون مرة عن انى اكون ظالمة
يارب جنبنى الظلم

السبت، 13 سبتمبر 2008

سوسته دوت كوم

المشهد الاول :
*********
بهلول: كبايه شاى سخيفة زى اللى عاملها

لم التفت لمثل هذه السخريه, فقد اعتدت عليها من ناحيه , ومن ناحيه اخرى قد يكون لابى وجهة نظر ثاقبه فيما قاله بخصوص ذلك الكوب الناتج من تفاعل قليل من الشاى والسكر مع كثير من الماء المغلى ليقدم له مع مزيد من المقدمات المصحوبه بشئ من الارتباك.......هل هذا وقت مناسب؟ ام انتظر الرشفه الثانيه له والتى من المستحيل ان يفعلها مع هذه النكهة الغبيه؟.....كلا ....... ساحسم الامر.

زغلول:عايز كمبيوتر .
بهلول:لا يابنى شكرا ...كتر خيرك
زغلول:لا يا بابا !...ده مش سؤال ....ده طلب!!!!!!

ينظر لى وقد بدات عينيه تطلق بريق غريب المنظر...

بهلول:عايز تدخل الميكروسوفت فى بيتى ؟ اهو ده اللى كان ناقص.....يااخى خاف على سمعة اخواتك البنات!
زغلول: اخواتى البنات؟..دول متجوزين وفى بيوتهم!...وبعدين مافيش علاقه بين الكمبيوتر واخواتى البنات!!!
بهلول: ولو.
زغلول : ليه بس ؟
بهلول :لما تبقى تشتغل وتحس بطعم القرش تبقى تجيبه ساعتها فى بيتك.

قالها لى رافعا حاجب التهكم الايسر ...لينهى الموضوع ...ويمضى ...


المشهد الثانى :
*********

الام : الغذاء جاهز يابهلول.

نطقتها امى فاحتشدنا حول- الطبلية- فنحن ولا فخر ننتمى لتلك الطبقه المستورة التى تمتلك مائده طعام ولكنها تفضل الاكل على –الطبلية- فمائدة الطعام بالنسبه لنا لا تستخدم سوى للاستذكار, هل تعرفون هذه الطبقه؟....حسنا دعونا نستكمل .

زغلول :فول تاااااااااانى ؟حرام بقى .
الام :حرمت عليك عشتك , ده بدل ماتحمد ربنا على النعمه اللى غيرك مش لاقيها .
زغلول: حامده وشاكره ما قولناش حاجه ....بس النهارده بابا جاب معاه لحمة, وديتى اللحمه فين يا ماما ؟؟
الام : اسال ابوك.
زغلول : وديت اللحمه فين يا بابا اعترف ...فيه نا س مهمين شافوك معاها.
بهلول : جرى ايه يا زغلول...انا قولت لامك تخليها لعزومه بكرة.
زغلول : عزومة ايه ؟ اوعى تقولى ان اخواتى البنات واجوازهم وعيالهم معزومين عندنا ؟ حرام عليكم دا انا كان يجيلى زغطه من الصدمة.
بهلول : اطمن ....العزومه دى عشان عمك " مازاميزو".
زغلول : عمى "مازاميزو" ؟ هوة رجع من الامارات؟
بهلول : ايوة .
زغلول :وهوة يعنى ما كلشى لحمه عندهم فى الامارات وجاى بقى باكل حته اللحمة اليتيمه اللى عندنا؟
بهلول : اتلم ياواد ده عمك الكبير .

ثم صوت قادم من الشارع

منّص :" يازغلول يا كوارشى"...." ازغلوووووووووووووووووول" .
زغلول – من داخل الشقه- : ما حدش ياكل طبقى يا جماعه , انا طالع البلكونه اشوف "منّص" عايز ايه وجاى علطول.
الجميع [ الام وبهلول] :احسن برده.

وفى البلكونه

زغلول:صباحه فلّ يا "منّص".... اتفضل اتغذى معايا...ههه....هه...[يضحك بتراجع فى موقفه]
منّص : لا..لما تخلص الغداء ابقى انزلّى يا "كوارشى" انا على اول الشارع ..هه؟
زغلول : خير فيه حاجه؟
منّص : ياعمّ لما تخلص ابقى انزلّى والسلام.

نظرت اللى الداخل , تحديدا الى طبق الفول ثم :

زغلول : غذاء ايه بقى ؟ ماخلاص...ثوانى ونازلّك.

المشهد الثالث :
*********

عند اول الشارع

منص : اسمع الكلام يازغلول ....انت ماادماكشى غير الحل ده
زغلول : يستحيل يا منص مش انا اللى اعمل كده
منص : ياواد فتح مخك ده انت حتكسب دهب ...بلاش عشان خاطر مستقبلك والكلام الفارغ ده ...خلينا فى المهم ...الكمبيوتر يازغلول ...الانترنت ياكوارشى ؟
زغلول : انت اتجننت ؟ مش انا يا منصل اللى اشتغـ...... انت قولت ايه من شوية ؟
منص : الكمبيوتر ياكوارشى اللى ابوك منشف ريقك عليه ...ها قوت ايه ؟
زغلول : طب والموهبه , انت عارف انى ما بعرفشى أ....
منص : صدقنى الموهبه عندك يا كوارشى بس هيه اللى دفينه حبتين
زغلول : دفينه !!!!
منص : أينعم .
زغلول : طب على الاقل ادينى مهلة أفكر
منص : مافيش وقت للتفكير , انا خلاص قولت للجماعة انى لقيت واحد , وهمة عملوا حسابهم على كده
زغلول : طب قدر ابويا عرف ؟
منص : وإيه اللى حيعرفه بس ؟ ممممم اقولك ...قول لأبوك انك اشتغلت ممرضة ؟
زغلول : انت حتهزر ...لا ياعم انا حقوله الحقيقة يمكن اصعب عليه ويرجع فى كلامه ويجيبلى الكمبيوتر لما يعرف انى حنحرف


المشهد الرابع :
*********

فى البيت :


بهلول : حراااااااااام عليك يابنى هارتنى شااااااااااااااااى ارحم اهلى بقى وخش فى المفيد وبلاش شغل الاهوجية ده معايا على المساء.

لا ادرى من اين يعرف ابى - بهلول الكوارشى - فى كل مرة رغبتى فى التحدث عن موضوع ما ...يبدو هذا لى غير مألوفا بالمرة .

زغلول : عايز كمبيوتر
بهول : تانى ؟ احنا مش كنا خلصنا
زغلول : لأ ما خلصناش ....المرة دى مسألة حياه او موت
بهلول : يعنى ايه ؟ حتموتنى لو ما جيبتهولكشى ؟ آدى اللى كان ناقص ياسى زغلول
زغلول : لا يابابا ...ما اقصدشى انت , انا بتكلم عليا انا .
بهلول : وتموت كافر ؟ بقى دى آخرت تربيتى فيك ؟ كله من دلع امك , هى السبب
زغلول : يادى النيلة ....يابابا ركز معايا , انا قصدى ان قرارك المرادى حيبقى مفترق طرق بالنسبالى .
بهلول : وكمان عايز تهج وتسيب البيت ....
زغلول : انت عبيط يابابا ؟ قصدى ...
بهلول : ؟؟؟؟
زغلول : يالهوى مش قصدى ...أصل ؟
بهلول : ؟؟؟؟
زغلول : يوووووه لأ بقى ...شوف لو ما جيبتليش الكمبيوتر اللى انا عايزه أنا مضطر اغنى وألم النقطة ورا الرقاصة اللى منص بيشتغل عندها طبال
بهلول : ايه ؟ نقطة ؟
زغلول : ايوة
بهلول : انت عايز تشتغل كده ؟ ومع منص الفاشل ده ؟
زغلول : انا ما قولتش عايز ....ده كان مجرد اقتراح من منص وقابل للتفكير , عموما انا حبيت أقولك ايه اللى بيدور فى دماغى عشان تعرف قراراتك ممكن توصلنى لفين ؟
بهلول : قرارات ايه يابنى ؟
زغلول : قرارك بإنك مش حتجيبلى الكمبيوتر غير لما اشتغل واجيبه بفلوسى , شفت ازاى انا ماارضتشى انحرف غير لما اقولك الاول ؟
بهلول : يا حبيبى يابنى
زغلول : يا حبيبى يابابا ..... يعنى خلاص رضيت عنى وحتجيبلى الكمبيو...
بهلول : طبعا يا زغلول انا مااقدرشى اقف فى طريق سعادتك , ها ما قولتليش يعنى ؟
زغلول : نعمين يابابا ؟
بهلول : حتآخد كام بقى فى الشهر ؟
زغلول : ايه ؟
بهلول : انا بقول يستحسن التعامل باليومية طالما الموضوع فيه نقطة
زغلول : نعم ؟؟!!؟؟!!؟؟
بهلول : قولتلى رقم موبايل استاذ منص كام ؟

المشهد الخامس :
***********

وفى احد الصالات الليلية السكة :

منص : ها طمنى يا زغلول ! حفظت كلمات الاغنية كويس ؟
زغلول : اه , بس مش عارف ليه حاسس انى متوتر وقلبى عمال يدق؟
منص : عادى , انا كنت كده برده فى اول يوم طبلت فيه وراء الست سوسته , جمد قلبك واطمن , الموسيقى لما تعلى حتبقى مع نفسك ومش حتسمع حتى اللى حواليك .

ودقت المازيكا .... :

زغلول :حبيبتى ياأم شعر حلو نازل ع القفه
تعالى انا وانتى سوا سوا فى الدفــــا

الراقصة سوسته : يخربيت حنجرتك , ده صوت ده , وقعتك زى وشك [ ثم تميل ناحية منص وتقول ] على ياواد يا منص الطبلة عشان ندارى على كلام المنيل على عينه .
منص : مش سامعك ياست سوسته ... كنت بتقولى ايه ؟ [ متعجبا !!] هيه ليه بتشاور على كوارشى وبتزغورله بعنيها ؟؟ لازم صوته عجبها [ فى نفسه ] لما اشاورله عشان اطمنه واشجعه .
زغلول : حبيبتى يا حبيتـى حبينى وخلصـــــــــــى
حطينى جوا قلبك وفى قلبى لغوصــــــى
ده انا قلبى لو قصب حيقولك مصمصى

الراقصة سوسته : مصمصك عفريت .... [ تتوقف عن الرقص ] يادومة , ياشنح تعالوا هنا وأرمو الزفت ده بره .
طااااااخ طيخ بووووووم آآآآآآه


المشهد السادس :
***********

افترقت انا ومنص بعد وصلة علقه ساخنه , وقد اوصلنى الى البيت متمنيا لى ان اصبح على خير , ولكن ليس كل ما يتمنى المرء يدركه , فقد استيقظت وحول عينى اليمنى زخارف بنفسجية اللون .

زغلول : اقفلى الشباك ياماما عايز انام شويه
الام : نامت عليك حيطة , احنا خلاص بقينا الظهر
زغلول : الظهر !! ليه هيه الساعه كام دلوقتى ؟
الام : الساعه 3 , يلا قوم اغسل وشك عشان تسلم على عمك مزاميزو
زغلول : هوة جه ؟ يعنى اخيرا حناكل اللحمة ؟
الام : يامصيبتى ؟ [ تقولها شاهقة ]
زغلول : ايه كلتوها خلاص ؟
الام : ايه يا واد اللى وشك ده ؟
زغلول : فى وشى ايه ؟ ............ اه دول شويه حرامية طلعوا على منص واحنا رايحيين الشغل امبارح , واضطريت انقذه منهم , بس ايه .... فرمو... قصدى فرمتهم
الام : وطبعا بسلامتك ما روحتش الشغل ؟
زغلول : جرى ايه ياماما , اروح الشغل ازاى فى اول يوم كده وانا وشى متشلفط على الاخر ؟
الام : كتك خيبة , وابوك شافك بالمنظر ده ؟
زغلول : لأه .... أنا جيت امبارح بالليل لقيتكم نايميين فما حبيتشى ازعجكم ... وبعدين دى حاجة بسيطة .
الام : بسيطة ؟ طب يافالح روح اغسل وشك وغير هدومك عقبال ما أطلع امهد لأبوك وعمك عشان ما يتخضوش لما يشوفوك

المشهد السابع :
**********

زغلول :عمو مزاميزو حبيبى
مزاميزو : ازيك ياواد يا زغلول
زغلول :شغال يا عمو
مزاميزو : انا فخور بيك يا بنى ... ياريت كل شباب مصر يبقى زيك كده
زغلول : اية ؟ اه .. ايوة
مزاميزو : ها .. احكيلى بقى ضربت كام واحد امبارح فى الخناقة
زغلول : مش فاهم!!!!؟؟
مزاميزو : اطلع من دوووووول... ماما حكيتلنا على بطولتلك وشجاعتك امبارح مع صاحبك , طالع لعمك , طول عمرى كنت فتوة الحتة
زغلول : ياسلاااااااااااااااام ؟؟!!
مزاميزو : امال ايه ؟ ده انا بس كنت ازعق بصوتى وبعديها الضرب يشتغل فى المليان
زغلول : بدأت اقتنع بأنى طالعلك
بهلول : عمك يازغلول ناوى يستقر فى مصر خلاص , وكمان جايبلك خبر جميل علشانك
زغلول : خير يا جماعة , حيسفر بابا بدالة ؟؟
مزاميزو : لا يابنى , ده انا جايبلك شغلانة
زغلول : مغنى وراء رقاصة ولا طبال؟؟
مزاميزو : ايه ؟؟ لا طبعا انا ناوى افتح " سيبر نت "وعايزك تمسك الشغل معايا .
زغلول : الكمبيوتر [قلتها ساهما هائما ]
مزاميزو : [قاطعنى] وتقدر طبعا تقعد على اى جهاز كمبيوتر فى الوقت اللى تحبه , انا عرفت من ابوك انك غاوى كمبيوتر .. واهى فرصة كويسة تمارس فيها هوايتك وكمان تآخد مرتب عليها , وانت وشطارتك بقى ..... زغلول .... انت معايا يابنى؟
زغلول : .........................
مزاميزو : زغلول انت روحت فين ؟ها قولت ايه ؟
زغلول : قولت اعملك كباية شاى ياعمى

الأربعاء، 3 سبتمبر 2008

انا مزقططة


يا مساء الخير عليكم , عارفه اننا فى الصيف , وان لسة بدرى على الربيع , بس بردو الدنيا ربيع والجو بديع , و اتارى الدنيا بمبى , وما طلعتشى كلها سودة ولا حاجه زى ما كنت فاكرة , طبعا ده ما يمنعشى ان السعادة المفرطة اللى انا فيها دى يشوبها بعض العيوب يعنى مثلا الابتسامة البلهاء المرسومة لا اراديا على شفتاى - حلوة شفتاى دى - وكذلك حالة التتنيح فى اللاشيئ والاسبهلال المستمر , ما ليش نفس آكل , بشبع اوتوماتيك , واحيانا بمشى فى الشارع مشية البطة البلدى المزقططة بعد عملية تزغيط ناجحة , والسؤال بقى : هل انا كدة انسانة طبيعية , ولا اروح احجز عند دكتور نفسانى من دلوقتى عشان اكسب وقت ؟