حبيبى قالى :

حبيبى قالى النهاردة " عيشى يابنتى الطظ الكبيرة " , وصدمنى اكتر لما قالى بكل فخر : " يعنى انا مثلا بخش الساعة 10 على بتاعت الامضى اللى المفروض امضى عندها الساعة 8 بكتيرى , ومع ذلك بقولها بكل بجاحة شهلى شوية ومضينى بسرعة عشان انا مستعجل اوى وعايز اروح " .

طول عمرى اتمنى اطلع زيه فى بجاحته وجرأته مع الاخرين .

هوة صحيح متجوز وعايش حاليا حياة شبه مستقلة , بس ده ما يمنعشى انى فاكراله ايام كتيييييييييييييييير كنت بحاول – مجرد محاولة – انى اصحيه من نومه عشان يروح شغله.... بجد ببقى معجبه بيه جدا لما يطنشنى ويروح هاششنى زى النموسة لما اقوله : " بس حتنام ازاى وتكنسل الشغل النهاردة وانت مخلص كل ايام اجازاتك ؟ " ويبهرنى برقته لما يرد عليا ويقول : " أبو الشغل وأبو اللى عايز يصحى " .


ليه اقول مأثورة كتيرة بحبها وبصبر بيها نفسى على الغلب اللى انا شوفته فى حياتى القصيورة فى بعده عنى ....مثلا زى : " لما بشوفك ماسكة الجورنال بحس ان مش ناقصلك غير نظارة كعب كباية وتبقى شبه سنوايت " شفته رومانسيته .

هوة اينعم سنوايت ما كانتشى بنظارة , ولا عمرهم حاكولنا زمان ان سنوايت كانت بتقراء الجرايد للاقزام السبعة ...بس برده بحب اكسبرشناته .

ياسلام عليه لما يتكلم فى السياسة بحس ان فيه بذرة عبقرية جواه ... ومش حقدر انسى يوم اعدام صدام حسين لما الدموع فرت من عينه وهوة بيقول : " هوة مين اللى حيحكم العراق بعد ما ادهم صبرى تنحى عن الحكم ؟"


بجد بحبه مووووووووووت .


ياسمين يوسف