من غير زعل :

واحدة صاحبتى قالتلى جملة فعلا جامدة جدا وبالنسبالى...
واحدة صاحبتى قالتلى جملة فعلا جامدة جدا وبالنسبالى كانوا صدمة صحيتنى على حقيقة او واقع ملموس لدرجة انى ما ركزتش فى كلامها اللى كان معايا بعد كده يلا بينا ؟ ماسى يلا بينا ...الجملة : " قطيعة تقطع الرجالة وسنينهم .... كلهم زفت ...وحتى الكويس معايا وحش مع غيرى" ؟؟؟؟؟؟؟؟وبالقياس فى المنطق :

كل الرجالة زفت

الكويس معايا رجالة

____________

اذن الكويس معايا زفت

طب طب ... بشويش ؟ نبتدى بالنتيجة بتاعت القياس اللى قلته فى الاول , لو افترضنا ان المعلومة اللى بنيت عليها القياس دى صح اساسا فمعنى كده ان فيه هم " معين " البنات بتعانى منه , وهى ان مافيش واحد حيتأدملها الا لو كان زفت , الحمد لله انى ما عنديش وقت اتجوز ...الحمد لله , مممممممممم....حتقولوا بنخع عليكم لما قولت ما عنديش وقت اتجوز مش كده ؟ معلشى منه لله هربرت صمويل ودويتش وماكويل وماكبرايد والعولمة والبنيويه و.......عالم ابحاث ابحاث ......معلشى فترة وحتعدى .

طب انا دلوقتى ذنبى ايه اذا كان كل اللى اتأدمولى لحد دلوقتى سورى يعنى " زفت " , اللى امه غاصبه عليه , واللى يقولى اعكسها وأحجز عروسة وبعدين افكر فى الجواز , واللى جايلى من مسلسل ذئاب الجبل , واللى جايبلى شوكالاته واول ما يخش البيت عندنا يفتحها وهاتك يا أكل فيها , واللى يدخل بالاربع ساعات وفى الاخر يقول ما شفتهاش كويس وبعدين يسأل ماما ببراءة ممكن آجى تانى ؟ وانا عجلة وعايز يآخدها كمان لفه ؟ واللى واللى واللى .......

ومن غير زعل ولا موآخذه كده الرجالة والولاد - بتوع اليومين دول - كلهم نيلة وزفت وقطران ومافيهومشى واحد عدل , وكلهم عايزين الضرب على نفوخهم . اللى ابقى قاعدة جمبه فى المشروع والاقيه مطلع خرطوشة سجاير ويعزم بيها على المشورع كله ولما اكح يقول للى جمبه: " ياعم سيبك من اللى بيكحوا دول عالم ما فيهومشى صحة زينا " ....اسم الله على صحته من الهباب اللى بيطفحه ده ...بلاش ده ناخد غيره ....انا بطبيعتى دايما وانا فى سكتى من الكليه للبيت بشترى جورنال " الدستور طبعا " وهاتك ياتريقة طول ماانا ماشية والجورنال باين ..... يالهووووووووووووووووى... اللى يقولى : "خلاص الثقافة مقطعة بعضها " , واللى يقولى : " ياعم دى معارضة " , بلااااااااااش كده ...جربت اخبى الجورنال جوة الاسكتش بتاعى بس طرفة لازم بيبان غصب عنى لان الاسكتش بتاعى صغنونة , وبردة تريقة وتعليقات سخيفة اخرها " مخبية متفجرات دى ولا ايه " , " بتوزع منشورات " , " دى باين عليها اخوان " ؟؟؟؟؟؟؟

المهم .... انا حسيبكم دلوقتى عشان مصدعة جدا جدا , ولازم انام بدرى عشان اصحى بدرى عشان ورايا حاجات متلتلة جدا لازم اقدمها لدكتور غريب وبعديـ........ , بتسألوا مين دكتور غريب ده ؟ والله فكرة ححكيلكم مين دكتور غريب ده المرة الجاية , وعموما مؤقتا الراجل ده يعرف بإختصار شديد على انه " كائن حى يعيش ويتعايش " .

ونكمل المرة الجاية ,

اشوفكم على خير ,

وتصبحوا على خير

.ياسمين يوسف